Для клира и народа, Из чинопоследований — читать, скачать

При начатии всякаго добраго дела

Тропарь гл. 2. Творче и Создателю всяческих, Боже, | дела рук наших, к славе Твоей начинаемая, | Твоим благословением спешно исправи, | и нас от всякаго зла избави, | яко един всесилен и Человеколюбец.

Кондак, гл. 6. Скорый в заступление и крепкий в помощь, | предстани благодатию силы Твоея ныне, и благословив укрепи, | и в совершение намерения благаго дела рабов Твоих произведи: | вся бо, елика хощеши, | яко сильный Бог творити можеши.

Прокимен, гл. 4. Буди светлость Господа Бога нашего на нас, | и дела рук наших исправи.

Тропарь, гл. 6. Яко посреде учеников Твоих, | пришел еси, Спасе. | мир дая им, | прииди к нам, и спаси нас.

Другой. Безкнижныя ученики Дух Твой Святый наказатели яви Христе Боже, | и многовещанным сличием языков прелесть упраздни, | яко всесилен.

Слава, гл. 8. Благословен еси, Христе Боже наш, Иже премудры ловцы явлей, | низпослав им Духа Святаго, | и теми уловлей вселенную, человеколюбче Христе Боже наш, слава Тебе.

И ныне, гл. 8. Предстательство христиан непостыдное, | ходатайство ко Творцу непреложное, | не презри грешных молений гласы, но предвари яко Благая на помощь нас, верно зовущих Ти: | ускори на молитву, | и потщися на умоление, | предстательствующи присно, Богородице, чтущих Тя.

Прокимен, гл. 4. Из уст младенец, и ссущих совершил еси хвалу.

Тропарь, гл. 4. Благодарим суще недостойнии раби Твои, Господи, | о Твоих великих благодеяниих на нас бывших, | славяще Тя хвалим, благословим, благодарим, поем, и величаем Твое благоутробие, | и рабски любовию вопием Ти: | благодетелю Спасе наш, слава Тебе.

Кондак, гл. 3. Твоих благодеяний, и даров туне яко раби непотребнии сподобльшеся, Владыко, | к Тебе усердно притекающе, благодарение по силе приносим, | и Тебе, яко благодетеля и Творца славящее, вопием: | слава Тебе, Боже прещедрый.

Богородичен. гл. 3. Богородице Христианом помощнице, | Твое предстательство стяжавше раби Твои, | благодарно Тебе вопием: | радуйся. Пречистая Богородице Дево, | и от всех нас бед Твоими молитвами всегда избави, | едина вскоре предстательствующая.

Прокимен, гл. 4. Воспеваю Господеви, благодеявшему мне, | и пою имени Господа Вышняго.

Хвалебная песнь св. Амвросия Медиоланскаго. Тебе Бога хвалим, | Тебе Господа исповедуем, | Тебе превечнаго Отца вся земля величает: | Тебе вси ангели. Тебе небеса и вся силы, | Тебе херувими и серафими непрестанными гласи взывают: | Свят, Свят, Свят Господь Бог Саваоф, | полны суть небеса и земля величества славы Твоея. | Тебе преславный апостольский лик, | Тебе пророческое хвалебное число, | Тебе хвалит пресветлое мученическое воинство | Тебе по всей вселенней исповедает святая Церковь, Отца непостижимаго величества, | покланяемаго Твоего истиннаго и Единороднаго Сына, | и Святаго Утешителя Духа. | Ты Царю славы. Христе, | Ты Отца присносущный Сын еси: | Ты, ко избавлению приемля человека, не возгнушался еси девическаго чрева: | Ты, одолев смерти жало, | отверзл еси верующим царство небесное: | Ты одесную Бога седиши | во славе Отчей, | Судия прийти веришися. | Тебе убо просим, | помози рабам Твоим, | их же честною кровию искупил еси; | сподоби со святыми Твоими в вечней славе Твоей царствовати. | Спаси люди Твоя, Господи, | и благослови достояние Твое, | исправия, и вознеси их во веки: | во вся дни благословим Тебе, | и восхвалим имя Твое во век, и во век века. | Сподоби, Господи, в день сей без греха сохранитися нам; | помилуй нас, Господи, помилуй нас,| буди милость Твоя, Господи, на нас, | яко же уповахом на Тя. | На Тя, Господи, уповахом, | да не постыдимся во веки, аминь.

Тропари мертвым, гл. 5

(Припев) Благословен еси Господи, научи мя оправданием Твоим

–      Святых лик обрете источник жизни | и дверь райскую, да обрящу и аз путь покаянием: погибшее овча аз есмь, | воззови мя, Спасе, и спаси мя.

–      Агнца Божия проповедавше, | и заклани бытие яко же агнцы | и к жизни нестареемей, святии, и присносущней преставльшеся, | Того прилежно, мученицы, молите, | долгов разрешение нам даровати.

–      В путь узкий хождшии прискорбный, | вси в житии крест яко ярем вземшии, | и Мне последовавший верою, | приидите насладитеся, | их же уготовах вам почестей и венцов небесных.

– Образ есмь неизреченный Твоея славы, | аще и язвы ношу прегрешений: | ущедри Твое создание, Владыко, | и очисти Твоим благоутробием, | и возжеленное отечество подаждь ми, | рая паки жителя мя сотворяя.

–      Древле убо от не сущих создавый мя, | и образом Твоим Божественным почтый, | преступлением же заповеди | паки мя возвративый в землю, от неяже взят бых, | на еже по подобию возведи | древнею добротою возобразитися.

–      Упокой Боже, раба Твоего | (или рабу Твою, или рабы Твоя), и учини его (или ю, или я) в раи, | идеже лицы святых Господи, | и праведницы сияют яко светила: | усопшаго раба Твоего (или усопшую рабу Твою, или усопшия рабы Твоя) упокой, | презирая его (или ея, или их) вся согрешения.

Слава. Трисиятельное единаго Божества, благочестно поем вопиюще: | свят еси Отце безначальный, | собезначальный Сыне и Божественный Душе: | просвети нас верою Тебе служащих, | и вечнаго огня исхити.

И ныне. Радуйся, Чистая, | Бога плотию рождшая во спасение всех. | Его же род человеческий обрете спасение, | Тобою да обрящем рай, Богородице чистая благословенная.

Аллилуия, аллилуия, аллилуия, | слава Тебе Боже (трижды).

Седален, гл. 5. Покой, Спасе наш, | с праведными раба Твоего (или рабу Твою, или рабы Твоя), | и сего (или сию, или сия) всели во дворы Твоя, | яко же есть писано: | презирая яко благ прегрешения его (или ея, или их) вольная и невольная, и вся яже в ведении и не в ведении, Человеколюбче.

Слава, и ныне, Богородичен. От Девы возсияный миру, Христе Боже, сыны света Тою показавый, помилуй нас.

Ирмосы, гл. 8. Песнь 1-ая. Воду прошед яко сушу, | и египетскаго зла избежав, | израильтянин вопияше: избавителю и Богу нашему поим.

Припев. Покой, Господи, душу усопшаго раба Твоего.

Слава, и ныне.

Песнь 3-я. Небеснаго круга | верхотворче, Господи, и церкве Зиждителю, Ты мене утверди в любви Твоей, | желаний краю, верных утверждение, едине Человеколюбче.

Седален, гл. 6. Воистинну суета всяческая, житие же сень, и соние: | ибо всуе мятется всяк земнородный, яко же рече Писание: | егда мир приобрящем, | тогда во гроб вселимся, | идеже вкупе царие и нищий. | Тем же, Христе Боже, | преставльшагося (или: преставльшуюся, или: преставльшияся) упокой, | яко Человеколюбец.

Слава, и ныне. Всесвятая Богородице, | во время живота моего не остави мене, | человеческому предстательству не ввери мя, | но Сама заступи и помилуй мя.

Песнь 4-я. Ты мои крепость, Господи, | Ты моя и сила, Ты мой Бог, Ты мое радование, | не оставль недра Отча, | и нашу нищету посетив. | Теми с пророком Аввакумом зову Ти: | силе Твоей слава, Человеколюбче.

Песнь 5-я. Всякую мя отринул еси | от лица Твоего, Свете незаходимый, | и покрыла мя есть чуждая тьма окаяннаго; | но обрати мя, и к свету заповедей Твоих | пути моя направи, молюся.

Песнь 6-я. Молитву пролию ко Господу. | и Тому возвещу печали моя: | яко зол душа моя исполнися, | и живот мой аду приближися: | и молюся яко Иона: | от тли, Боже, возведи мя.

Кондак. гл. 8. Со святыми упокой, | Христе, душу раба Твоего | (или: рабы Твоея, или: души раб Твоих), идеже несть болезнь, ни печаль, ни воздыхание, но жизнь бесконечная.

Икос. Сам един еси бессмертный, сотворивый и создавый человека: | земнии убо от земли создахомся | и в землю туюжде пойдем, | яко же повелел еси, создавый ми и рекий ми: | яко земля еси и в землю отъидеши, | аможе вси человецы пойдем, надгробное рыдание творяще песнь: | аллилуия, аллилуия, аллилуия.

Песнь 7-я. Отроцы еврейстии в пещи | попраша пламень дерзновенно | и на росу огнь преложиша, вопиюще: | благословен еси, Господи Боже, во веки.

Песнь 8-я. Мусикийским органом согласующим, | и людем безчисленным покланяющимся образу в Деире, | три отроцы не повинувшеся, | Господа воспеваху и славословляху во вся веки.

Лик: Дуси и души праведных восхвалят Тя, Господи.

Песнь 9-я. Ужасеся о сем небо, | и земли удивишася концы, | яко Бог явися человеком плотски, | и чрево Твое бысть пространнейшее небес: | тем Тя, Богородицу, | Ангелов и человек чиноначалия величают.

Трисвятое… Отче наш.

Тропарь, гл. 4. Со духи праведных скончавшихся душу раба Твоего (или: рабы Твоея, или: души раб Твоих), Спасе, упокой, | сохраняя ю (или: их) во блаженней жизни, яже у тебе, Человеколюбче.

–      В покоищи Твоем, Господи, | идеже вси святии Твои упокоеваются, | упокой и душу раба Твоего (или: рабы Твоея, или: души раб Твоих), яко един еси Человеколюбец.

Слава: Ты еси Бог, сошедый во ад и узы окованных разрешивый, | Сам и душу раба Твоего (или: рабы Твоея, или: души раб Твоих) упокой.

И ныне: Едина чистая и непорочная Дево, Бога без семене рождшая, | моли спастися души его (или: ея, или: душам их).

–      Во блаженном успении вечный покой подаждь, Господи, успшему рабу Твоему (или: успшей рабе Твоей, или: успшим рабом Твоим) (имя рек), и сотвори ему (или: ей, или: им) вечную память. || Вечная память. (Трижды).

Стихиры из чина погребения умерших

– Гл. 8. Плачу и рыдаю, | егда помышляю смерть, и вижду во гробех лежащую | по образу Божию созданную нашу красоту, | безобразну, безславну, | не имущую вида. | О чудесе! | что еже о нас сие бысть таинство? | како предахомся тлению? | како сопрягохомся смерти? | воистинну Божиим повелением, | яко же есть писано, | подающаго преставльнимся покой.

–      Слава, гл. 6. Зряще мя безгласна. | и бездыханна предлежаща, | восплачите о мне, братие и друзи, сродницы и знаемии: | вчерашний бо день беседовах с вами, | и внезапу найде на мя страшный час смертный. | Но приидите вси любящий мя, | и целуйте мя последним целованием, | не ктому бо с вами похожду, | или собеседую прочее: | к Судии бо отхожду, | идеже несть лицеприятия: | раб бо и владыка вкупе предстоят, | царь и воин, богатый и убогий, | в равнем достоинстве: | кийждо бо от своих дел | или прославится, или постыдится. | Но прошу всех и молю, | непрестанно о мне молитеся Христу Богу, | да не низведен буду по грехом моим, | на место мучения; | но да вчинит мя, идеже свет животный.

–      И ныне, гл. 6. Богородичен. Молитвами Рождшия Тя, Христе, | и Предтечи Твоего, | Апостолов, Пророков, Иерархов, | преподобных и праведных, и всех Святых, | усопшаго раба Твоего упокой.

Малое освящение воды

Тропари, гл. 4. К Богородице прилежно ныне…

Слава и ныне, гл. 4. Не умолчим никогда…

Тропарь, гл. 6. Еже радуйся Ангелом приимшая, | и рождшая Зиждителя Твоего, Дево, спасай Тя величающия.

–      Воспеваем Сына Твоего, Богородице, | и вопием. Пречистая Владычице, | всякия беды избави рабы Твоя:

–      Царем, пророком и апостолом, | и мучеником Ты еси похвала, | и предстательница миру, Всенепорочная.

–      Язык всяк православных похваляет, и блажит, | и славит пречистое Рождество Твое, | Марие Богоневестная.

–      Даждь, Христе мой, и мне недостойному | долгов оставление, молюся Тя рождшия молитвами, | яко благоутробен.

Слава: – Отца и Сына славословим, | и Духа Святаго, глаголюще: | Троице Святая, спаси души наша.

И ныне: – Неизреченно в последняя заченшая, | и рождшая Создателя Твоего, | Дево, спасай Тя величающия.

–      Милосердия двери отверзи нам, | благословеная Богородице, надеющийся на Тя да не погибнем, | но да избавимся Тобою от бед: | Ты бо еси спасение рода христианскаго.

Гл. 6. Ныне наста время всех освящающее, и Праведный нас ждет Судия, | но обратися душе к покаянию, | яко блудница зовущи со слезами: | Господи, помилуй мя.

– Водами одождивый, Христе, источник исцелений, | во всечестнем храме Девы днесь, | Твоего благословения окроплением, | отгоняеши недуги немотствующих, | Врачу душ и телес наших.

–      Дева родила еси неискусобрачная | и Дево пребыла еси, Мати безневестная. | Богородице Марие, | Христа Бога нашего моли спастися нам.

–      Пресвятая Богородице Дево, | рук наших дела исправи, | и прощение прегрешений наших испроси, | внегда пети нам Ангельское пение.

Святый Боже, Святый Крепкий, Святый Безсмертный, помилуй нас…

Прокимен, гл. 3. Господь просвещение мое, | и Спаситель мой, кого убоюся.

Тропарь, гл. 1. Спаси, Господи, люди Твоя…

Тропарь, гл. 2. Твоих даров достойны нас сотвори, Богородице Дево, | презирающи согрешения наша, | и подаюши исцеления верою приемлющим благословение Твое, Пречистая.

–      гл. 4. Источник исцелений, имуще святии бессребреницы, | исцеления подаваете всем требующим, | яко превелиих дарований сподобльшиися | от приснотекущаго источника Спаса нашего, | Глаголет бо к вам Господь, | яко единоревнителем апостольским: | седах вам власть на духи нечистыя, | яко же тех изгонит, и целити всякий недуг, и всякую язю: | тем же в повелениих Его добре жительствовавше, | туне приясте, туне подаваете, | исцеляюще страсти душь и телес наших.

– гл. 4. Призри на моление Твоих раб Всенепорочная, | утоляющи лютая на ны востания, всякия скорби нас изменяющие | Тя бо едину твердое и известное утверждение имамы, | и Твое предстательство стяжахом, | да не постыдимся, Владычице, Тя призывающий. | Потщися на умоление, Тебе верою вопиющих: | радуйся Владычице, всех помоще, | радосте и покрове, и спасение душ наших.

–      гл. 8. Владычице, приими молитвы рабов Твоих, | и избави нас от всякия нужды и печали.

Понравилась статья? Поделиться с друзьями:
Твоя молитва
Добавить комментарий

;-) :| :x :twisted: :smile: :shock: :sad: :roll: :razz: :oops: :o :mrgreen: :lol: :idea: :grin: :evil: :cry: :cool: :arrow: :???: :?: :!:

Adblock detector